Munthu Omwe Akhabzigwata Lirime

M'magole ya 1977-1980 pakhana munthu m'bodzi dzina lace Joni Nyoka, omwe akhaimba na kubzina, ndipo iye akhabzigwata lirime, aciriyikha mu ndiro, wanthu wense aciwona na maso, uko ali kubzina basi. Ndipo iye akhatenga pomwe mafuta yakugasira moto, acibziwazira-wazira m'thupi mwace, akamala acigasa moto, pamwepo iye akhapsa lini napo moto ule ukhagaka m'thupi mwacemo. Bzimwebzi bzidacitika ku Songo, boma la Cahora-Basa.

Tsono wanthu akhambalewa kuti pacindowoneka munthu m'bodzi acikagwata m'figu pa nthawe yomwe munthuyo akhagwata lirime lacero, iro lingadalumikidzika lini pomwe. Ndipo akhalewambo kuti umweyo ukhali msambo wace wakumbabzigwata lirime pa nthawe yomwe akhabzina m’thambwe.

Yenseneya ni madzondzoni ya mu África mwathu muno. N'cadidi kuti bzinthu ninga bzimwebzi bzimbacitika, tsono wanthu azinji ambabvuma lini, napo bzicicitika bzinango kuposa bzimwebzi. Nsiku zino bzimwebzi bziri kucitika lini kwene-kwene ninga momwe bzikhacitikira kale-kale.