Cikondweso Kudzulu

Kakale-kale, bzirombo bzense bzomwe bzina nyanga, bzidapangana kuti bzicite cikondweso. Bzikhafunika kuti cikondweso cimweco cikacitikire kudzulu, ndipo cikhali cikondweso ca bzirombo bzomwe bzina nyanga. Tsono nkhumba idasirirambo, ndipo idati mu mtima mwace: “Inepano ndiribe nyanga, ndin'cita tani?”

Tenepo, nkhumbayo idakumbuka kuti bza kutenga phula, icinyatika nyanga mu msolo, ndipo idacitadi bzimwebzo. Tsono, bvuto ndakuti cikondweso cire cingadacitikira pa dzuwa. Pomwe cikondwesoco cikhali mkati, phula lire lidayamba kusungunuka, ndipo nyanga zire zidayadayamba kugwa pansi.

Bzirombo bzense bzidadabwa bziciti: “Kodi mbani umweyu omwe alibe nyangayu? Wabwereranyi kuno?” Tenepo mkulu wa bzirombo bzire adatonga kuti: “Phatani nkhumbayo muithuse pansi”. Bzirombo bzire pakubva mafala yamweyo, cadidi bzidaiphata nkhumba ire, bziciyithusa pansi pano.

Tsoka lace, nkhumba pakugwa, idagwa na mulomo. Ndipopa mulomo wa nkhumba udapunduka napo na lero. Bzirombo bzire pomwe bzidathusa nkhumba ire bzidapitiriza na cikondweso cire. Lekani kudabwa kuwona mulomo wa nkhumba kucinyuka thangwe idapunduka kucokera pa nsiku imweyire.